صراخات من قلب الجبل بالمنيا والاهالي يجددون الاستغاثه بالمحافظ الجديد

احنا مش في نكسه احنا في كارثه
محدش عاوز يهتم بينا ولا ينفذ مطالبنا عشان احنا غلابه
مش مهم المشاكل اللي عندنا كلها المهم لقمه العيش
احنا مستعدين نشرب من الترعه بس اهم حاجه ترجعونا العمل بالمحاجر
هذا لسان حال اهل قري الصعيد بعد سنوات من الاهمال وعدم الاهتمام بهم من قبل الحكومات علي مر التاريخ
دفعهم ذالك إلى اليأس من حل مشاكلهم،كلمات تعبر عن الحزن والاسي والرضا باقل القليل وعدم انتظار شئ من الحكومه سوي عوده العمل بالمحاجر
رغم مشاكل القريه الكثيره التي اجمع عليها الاهالي من عدم وجود الصرف الصحي وعدم وجود خدمات وعدم وجود مراكز شباب وعدم وجود نظافه للقريه ورغم انقطاع المياه طوال النهار وكثيرا من الليل وغياب المرافق لكن الاهالي يتغاضون عن تلك المشاكل ويهتمون بمشكله واحده ألا وهي مشكله العمل بالمحاجر
نعم انها قريه الشرفاء التابعه لمركز المنيا والتي تبعد عن مبني المحافظه بخمس كيلو متر تقريبا
وليس هذا لسان قريه الشرفاء فقط كلا بل هو لسان كل قري شرق البحر.
(تحيا مصر)قامت برصد اوجاع صعيد مصر المهمل منذ سنوات طويله واستعرضت مشاكل سكان قريه الشرفاء بل كل مشاكل شرق البحر بل هي مشكله جمهوريه مصر العربيه وليست قاصره علي الصعيد فقط
وعندما التقينا بالاهالي كان مطلبهم الوحيد والاهم هو عوده العمل بالمحاجر وتخفيض سعر الضرائب وتسهيلها.
بدأت جولتنا بالحديث مع احد سكان القريه ويدعي الحاج علي عامل بالمحجر وعلي باب منزله جلسنا معه لكي نعرض وجهه نظره فقمنا بسؤاله عن مشاكل القريه
قال (القريه مليانه مشاكل ولكن المشكله المهمه والمصيبه الكبري هي الجبل وده المصدر الوحيد اللي بناكل منه عيش والبلد كلها بتعتمد علي الجبل وهو مصدر رزقنا ودلوقتي البلد كلها بقيت عواطليه بسبب غلق المحاجر والناس مش معاها فلوس والمعدات بتصدي ولو فكرنا نبيعها محدش بيشتريها غير خرده )
واثناء حديثنا قال جرجس توفيق عامل بالمحجر (ان الجبل مصدر خير للقريه والمحافظه والعماله بتيجي عندنا في القريه من جميع المحافظات من اسيوط وقنا وسوهاج بيأتوا إلى القريه لكي يعيشوا بها بسبب قربها من المحاجر وعشان رزقهم في الجبل)
ويقول الحاج رمضان 40 سنه صاحب مصنع في الجبل وصاحب مخبز (المشكله الاساسيه في المحافظه الجبل،الجبل هو محافظه المنيا بالكامل مافيش مصدر رزق غير الجبل،واحنا دلوقتي قري شرق البحر عواطليه لانهم وقفوا مصدر رزقنا.
احنا عاوزين حل لهذه المصيبه.وقال انا المشروع عامله من ذاتي وعامل قروض علشان اشتري المحجر هجيب من اين فلوس ادفع كل هذه الضرائب؟
ويسأل ويتسأل انا بكسب كام الف عشان ادفع اكثر من 400 الف ضرائب ؟؟؟
واضاف احد الاشخاص الجالسين ان بسبب المخالفات والمحاضر كثيرا من عمال القريه محبوسين لانهم مش قادرين يدفعوا الضرائب وبالتالي سوف تتشرد اسرهم.
وقمنا بالذهاب إلى احد المتضررين من وقف المحاجر وهو الحاج محمد حسين العمده صاحب محجرين بالجبل وبسؤالنا له عن تلك المشكله
قال(احنا مش في كارثه احنا في نكسه)
المحجر بيشتغل فيه 100 فرد وكل فرد في رقبته 5 افراد الناس دي اتشردت وبقيوا عواطليه
وقال في ايد الحكومه تحل بس تحل بالعدل والرحمه مش تفرض عليا ضرائب عاليه وانابشتري علاج علي نفقتي الخاصه واوضح وقال انا عندي امراض خطيره بسبب الجبل
وقال انا مستعد ادفع ولكن علي اقساط وتسهيلات.
واوضح ايضا ان المحاجر تضم عمال من جميع الفئات من المؤهلات العليا والمتوسطه والضعيفه
ويستغيث بالحكومه ويقول (سيبونا ناكل عيش خدوا مني كل حاجه الا لقمه العيش اللي بيشتغلوا في الجبل عندهم امراض من اشد الامراض وبيتعالجوا علي حسابهم)
ويستغيث ايضا بالرئيس السيسي ويقول (ياريس بص للناس الغلابه وتدخل لحل هذه المشكله مصر مش ناقصه عطل احنا عاوزين نمشي عجله الانتاج مش نزود البطاله ونوقف المصانع)
وعند سؤالنا له عن مشكله انقطاع المياه قال(انا مستعد اشرب من الترعه بس ارجع الجبل اشتغل وقال مش مهم كل المشاكل اللي عندنا احنا راضيين البلد مش ناقصه لكن اهم حاجه المحاجر تتفتح لان ده ادي إلى زياده نسبه البطاله وبالتالي سوف يؤدي إلى انحراف الشباب ودفعهم إلى السرقه والبلطجه وقطع الطرق)
ويضيف الحاج خليل ابراهيم صاحب محجر
ان مشكله المحاجر لها عده اسباب والسبب الرئيسي هو تطبيق قانون الثروه المعدنيه وكان هناك نظامين ألا وهوالترخيص والمخالفات
الترخيص كان يدفع الرسوم المبدئيه ورسوم القوات المسلحه وضريبه التأمينات وضريبه المبيعات والضريبه العامه
اما المخالفات:يتم دفع مخالفات شهريه من 1300ج:2500ج حسب المساحه
اتفاجئنا بتطبيق قانون الثروه المعدنيه الجديده لانه وضع بطريقه خاطئه وقال
اي صاحب محجر ما بيكسبش واوضح ذالك وقال عشان توصل لمرحله الانتاج انت بتاخد حته من الجبل عبقال ماتصلحها اقل مصاريف بتصرفها حوالي 350،000جنيه علي الاقل اين المقابل في ظل الركود الاقتصادي وفي ظل الوضع السئ التي تعيشه مصر الان.
ودلوقتي عشان ارخص قطعه من الجبل من ضمن بنود قانون الثروه المعدنيه لو مثلا متر في 100 متر يعني 1000متر هيدفعني عليها 70،000 الف وهيدفعني 70.000الف تأمين المحجر وهيدفعني 16.000 قيمه الموازنه اللي هيطلع يقيس كل 3 شهور وهدفع 41.4 تأمينات وانا مش مستفاد منها بحاجه وبعد ده كله هدفع 13% من قيمه الانتاج اتاوه لهيئه الثروه المعدنيه و17% ضريبه عامه وضريبه انتاج كده بقي 30% فين اللي هيفضل لصاحب المحجر.
وفي نهايه حديثنا معه (طالب الحكومه بتعديل قانون الثروه المعدنيه لانه لايصلح واوضح ان المنيا بالكامل معتمده علي الجبل والمحاجر حيث ان معظم الشباب هاجروا إلى المدن ورجعوا لعدم وجود فرص عمل.
وطالب الرئيس السيسي بمراعاه الشعب والحاله الاقتصاديه والبطاله التي زادت بسبب وقف المحجر)
وفي مشهد اخر
واثناء حديثنا مع الاهالي عن مشاكل القريه قالوا لايوجد صرف صحي مما يجعل الأهالي يضطرون لاستقدام سيارات الكسح شهريا لرفع الصرف الصحي من منازلهم في مشهد لا يمت بصلة للقرن الواحد والعشرين واضافوا ان الترعه مليئه بالقمامه والري بيطلع القمامه وبيسيبها علي حافه الترعه والمجلس بيجي يريمها بالترعه تاني مما ادي إلى ظهور الحشرات والفئران والثعابين وعدم قدرتنا علي المعيشه بسبب الناموس
وقال احد الشباب انه لايوجد مركز شباب بالقريه ومافيش غير القهوه هي المنفذ الوحيد لينا ولما بنلعب كوره بنلعب علي الطريق ويطلب من المحافظ بتخصيص قطعه ارض لكي تكون مركز شباب
يالها من معاناه حقا انهم شرفاء اسما علي مسمي يحبون العمل ولا يهمهم شيئا من المشاكل سوي وقف عملهم والرجوع إلى الجبل
والعمل به هو كل ما يتمنوه من الدنيا
ومن هنا يجدد الاهالي ندائهم للسيد اللواء طارق نصر محافظ المنيا بسرعه حل المشكله لان تلك المشكله كانت سبب رئيسي في فشل المحافظ السابق.